Barn sem slegið er með skó?

Lítið barn sem slegið er með skó - eða er barið reglulega? Barn sem er beitt ofbeldi er alltaf hrætt, augasteinarnir eru kvikir og sérhver lína í andlitinu þráir vernd. Ástúð.

Allar þessar líkingar og myndir sem flögra um í huga manns á venjulegum degi. Mér finnst sem Suðurlandabúar upp til sveita séu á stundum afar frumstæðir í uppeldismálum. Þeir trúa því líka að sykur sé meinhollur. Flestir nota helming af sykri á móti kaffi. Og kókómalt er vinsælasti barnadrykkurinn ef marka má auglýsingarnar (að sjálfsögðu helmingur af mjólk á móti sykurkakódufti!) en svo kyssa Spánverjar líka krakkana sína í tíma og ótíma og gera þá dúkkulega á kvöldin. Einsog í auglýsingum frá 1960. Tírólastíll fyrir drengina, iðulega í pastellitum. Hvítir sokkar og prinsessukjólar fyrir stelpurnar - að ógleymdum öllum slaufunum og borðunum.

Og svo mega börnin reyndar ekki trufla. Sem minnir mig á rithöfundinn Vigdísi Grímsdóttur. Ein af mínum uppáhaldsetningum eftir hana er á þessa leið:

Börn trufla ekki. Börn eru líf.

Framhaldið er ennþá fallegra, Vigdís talar um að það sé dauðinn - og hans hrifsikrumla - sem skekur allt ...

En hversvegna er fyrirsögnin á þessari færslu: Barn sem slegið er með skó? Ástæðan er einfaldlega sú að ég varð vitni að því í gærkvöldi að barn var hirt og slegið með inniskó. Hvað annað gat ég sagt en að vitna á eins fínlegan hátt og mér er unnt í áðurnefnd orð Vigdísar? Barsmíðarnar stöðvuðust og barnið settist hjá mér. Ég byrjaði auðvitað að reyna að sýna barninu vinsemd og ástúð sem endaði með því að það sofnaði í fanginu á mér. Ég verð stundum vitni að heimsku og ljótleika og finn þá einsog allir aðrir - að það er svo ósköp fátt sem hægt er að gera. Annað en þetta vanalega: Að reyna að láta gott af sér leiða. Reyna að vera almennileg manneskja.

Athugasemdir

[Steinunn Helga Sigurðardóttir, 5.7.2007 kl. 14:10]

Vigdís mín segir margt klókt og fallegt og það er gott að vitna í hana.

ég þekki þetta þegar maður verður vitni að atburð sem er mjög á móti manns samvisku, en maður reynir að hafa áhrif á hvað gerist og þróun atburðarins.

 mín skoðun er sú að maður á hreinlega og það er skilda manns að bregðast við þegar maður sér  aðra mannveru eða annað líf beitt órétti !

Ljós til þín og takk fyrir fallega færslu.

steina 

[Margrét Lóa Jónsdóttir, 6.7.2007 kl. 10:50]

Takk fyrir kveðjuna Steinunn! Ég finn að þú hefur líka oft hugsað um þessa hluti sem ég var að pára um. EN Þegar maður er í útlöndum og er eitthvað að sýsla, langar mann svo oft til að hafa allar bækurnar sínar í kringum sig (sér í lagi upp á tilvitnanir) og þá sakna ég sérstaklega ljóðabóka og uppáhaldskáldsagnanna minna - en það er auðvitað allt of þungt að burðast með slíka fjársjóði á milli landa!!! Ég er alltaf á bókasafni hér í Córdoba og af því að hér er svo svalt í fjörutíugráðunum okkar þá hreiðra ég hér um mig og hugsa oftar líka mun heim ... Besos y abrazos, þín M.

[Steinunn Helga Sigurðardóttir, 7.7.2007 kl. 11:31]

kæra Margrét !

þegar við fluttum út tók ég allar bækurnar mínar með , enda ætlaði ég að vera lengi. það er svo gott að geta gluggað í íslenskuna af og til. bókasafnið stækkar þó óðum af dönskum bókum, sem líka eru orðnar mikilvægar í lífi mínu.

hérna er rigning og rigning, þannig að ég ligg og les Paulo Coelho !!!

Dásamlegur rithöfundur.

Ljós til þín í hitann, héðan frá Lejre

Steina 

[Margrét Lóa Jónsdóttir, 9.7.2007 kl. 11:42]

Bambinas! Gaman ad heyra frá ykkur:)Er komin til Vejer de la frontera sem vid bjuggum í í EITT dásamlegt ár. Toda la familia. Dagarnir fljúga. El tiempo pasa rapido. Hef nurlad med bókina Skugga vindsins, og svo lét ég unglinginn á heimili fá hana ... Hún var jafn spennt og hrifin og ég.  

Sol y besos ! Er á leid til Cádiz, fer í strandferd í fyrsta sinn síadan vid komum, hlakka mikid til ad sjá sjóinn:)

[Steinunn Helga Sigurðardóttir, 10.7.2007 kl. 12:01]

njóta lífsins það er það besta sem við gerum í þessu lífi. happy !

Ljós til þín

steina 

[Edda Agnarsdóttir, 11.7.2007 kl. 20:34]

Kvitta - góð færsla.

[Steinunn Ólína Þorsteinsdóttir, 12.7.2007 kl. 04:17]

langar til að hitta þig aftur á spáni....bestu kveðjur og þar fram eftir götunum til ykkar allra

[Margrét Lóa Jónsdóttir, 16.7.2007 kl. 11:56]

Segjum tvær sæta Steina. Ég man enn eftir fallegri mynd sem þú sendir mér einu sinni frá Kópaskeri og auðvitað man ég líka vel eftir dögunum og kvöldunum sem við áttum saman í Barcelona! Ég er á sígaunalegu flakki um allan Spán núna, erum 7 á 7 manna bíl og núna er bókasafnið að loka. Til hamingju með nýja barnið, lífið bókina og alltsaman - þótt seint sé:) Ég hlakka til að staldra samt bráðum einhversstaðr við og byrja aftur að skrifa meira og blogga. Myndin af þér er annars snilld, Steinunn Ólína. Núna lokar safnið og ég er klukkuð hjá Elísabetu Ronalds? Hljómar sérlega nútímalega, adiós í bili: Y un monton de besos y abrazos de mi!

[Margrét Lóa Jónsdóttir, 16.7.2007 kl. 12:04]

Er búin að tékka á klukkinu. Takk kæra Elísabet:) Klukkan er tvö og safnið lokað og ég á leið með alla gríslingana í sundlaugargarð, núna þakka ég fyrir hve Spánverjar eru alltaf rólegir í tíðinni. Klukkan tvö er ég að skrifa athugasemdarfærslu en núna er safnið samt lokað. Enginn hvessir á mig augu ennþá!!!Ætla að hætta í bili og vera í góðri náð áfram hér á safninu. Stundum lána þau mér heyrnartól fyrir mússík og eitt og annað til - ég vil auðvitað halda í þessi góðu tengsl! Veriði áfaram svona dugleg að blogga, takk fyrir orðsendingarnar allir!!!

Með sólskinskveðju frá hinni fjölbreytilegu og dásamlegu Andalúsíu.